Greqi- Vritet me thikë 40-vjeçarja shqiptare, policia në kërkim të autorit

Një 40-vjeçare shqiptare është gjetur pa shenja jete në Greqi. Sipas mediave greke, bëhet me dije se 40-vjeçarja shqiptare është qëlluar me thikë në bark dhe si pasojë e plagës së marrë ka ndërruar jetë.

Policia ka mbërritur në vendngjarje dhe po kryen hetimet për zbardhjen e plotë të rrethanave si dhe po punon për identifikimin dhe kapjen e autorit/ve.

Dyshohet paraprakisht se shqiptarja është qëlluar nga partneri i saj, ndërsa raportohet nga mediat greke se ka një dëshmitar kyç, i cili pretendon se e ka parë 40-vjeçaren kur u godit me thikë në mes të rrugës. Policët pritet të marrin deklaratë nga dëshmitari për të vërtetuar nëse e ka parë autorin.

Sipas informacioneve, rezulton se 40-vjeçarja shqiptare e identifikuar nga mediat greke si Enkelejda Danaj kishte bërë 3 denoncime ndaj bashkëshortit të saj.

Veçanërisht, denoncimi i parë është bërë më 3 prill 2013, ku 40-vjeçarja ka denoncuar ish-partnerin për shkelje të legjislacionit për dhunën në familje. Më pas burri u arrestua dhe u dërgua në prokurori.

Ankesa e dytë është bërë më 18 shtator 2022 ku viktima ka denoncuar burrin e saj për kërcënime , lëndim fizik dhe abuzim verbal. Burri u arrestua sërish dhe u dërgua në prokurori. Në këtë pikë duhet theksuar se kishte një urdhër gjykate në bazë të të cilit bashkëshortit i ndalohej të jetonte me viktimën, por ajo vetë e kishte lejuar që në vitin 2018.

Ankesa e fundit është bërë më 7 maj 2024, sërish për dhunë në familje (kanosje, lëndim fizik dhe abuzim verbal). Burri u arrestua dhe u dërgua në prokurori.

40-vjeçarja u informua për mundësinë e instalimit të aplikacionit “Panic Button” në celularin e saj dhe iu dha një kod për të hyrë në aplikacionin në fjalë. Në të njëjtën kohë, ajo u informua për mundësinë e transferimit në një strukturë të cilën ajo e refuzoi.