Gripi i shpendëve, Ministria e Bujqësisë

Epidemiologu Ilir Alimehmeti ka qetësuar qytetarët duke deklaruar se nuk ka asnjë rrezik për pandemi nga metapneumovirusi human (HMPV).

Sipas tij, ky virus është i ngjashëm me gripin e zakonshëm dhe qarkullon prej shekujsh. Alimehmeti theksoi se virusi HMPV nuk ka asnjë ngjashmëri me kovidin, ndërsa shtoi se panikun e kanë shkaktuar pikërisht mediet, duke e raportuar si një virus të ri.

“Nuk është vetë virusi që shkakton problemin, por lajmet ndërkombëtare. Fatkeqësisht nuk është diçka që nuk e dinim. Nuk është virus i ri. Njerëzimi e ka izoluar në 2001. Aty ka qenë me shekuj. Ai vazhdon e qarkullon. Është i kudondodhur. Në muajt e dimrit qarkullon.

Nuk është i ngjashëm me kovidin, por me gripin. Transmetohet në të njëjtën mënyrë. Simptomat e njëjta dhe grupmoshat janë po ashtu të njëjta, fëmijët, të moshuarit dhe kushdo që ka probleme sëmundjesh dhe sistem imunitar të dobët. Kalon si gripi për 4–5 ditë. Ndonjë rast shkon dhe komplikohet po si gripi.

I ngjan kokë më kokë në shifra virusit të gripit të tipit A. Ky virus ka një mundësi tejet të ulët për pandemi. Ky virus ka dekada që nuk ka ndryshuar. Ndërsa gripi ka gjasa të larta për të dhënë pandemi.

10–12% e rasteve me probleme respiratorë shkaktohen nga HMPV në Europë”, deklaroi Alimehmeti për RTSH 24.

Çfarë është HMPV?

HMPV është një virus i rrugëve të sipërme të frymëmarrjes, shumë i ngjashëm me gripin. Ai u identifikua për herë të parë në 2001 në Holandë.

Si përhapet HMPV?

Cërkat e prodhuara gjatë kollitjes dhe teshtitjes.

Kontakti i ngushtë personal, si puthja, prekja ose shtrëngimi i duarve.

Prekja e sipërfaqeve të kontaminuara dhe më pas prekja e gojës, hundës ose syve.

Simptomat përfshijnë kollë, ethe, bllokim të hundëve dhe fishkëllima gjatë frymëshkëmbimit. Shumica e rasteve janë të lehta, me simptoma të ngjashme me rrufën e zakonshme.