Gushti, muaji i festivaleve, aktivitetet kulturore në Shkodër do të kenë si “kryefjalë” muzikën jazz

Korriku, veçse një muaj i nxehtë me temperatura të larta, solli në Shkodër atmosferën e bukur të koncerteve të verës të cilat nisën në fillim të muajit me pjesëmarrjen e artistëve më në zë të vendit dhe që u zhvilluan në sheshin e shatërvanit të pagëzuar me emrin “Kryezona ku mblidhen kampiona”.

Koncertet e verës do të vijojnë përgjatë gjithë muajit gusht duke u përqendruar kryesisht në një nga pikat më të bukura turistike buzë Adriatikut siç është plazhi i Velipojës. Artistë dhe grupe të njohura muzikore si: Famfara Fest, Urban Band apo Tre Muskëtierët priten të zbukurojnë netët e verës për shkodranët në shesh.

Gushti është i lidhur me muzikën jazz dhe në Shkodër do të vijojë tradita e organizimit të festivalit “Shkodra Jazz”. Ai do të mbahet nga data 12 gusht. Edicioni i XV i tij do të mbyllet më 1 shtator. Si përherë edhe në këtë,  risitë e organizimit të tij do të vijojnë të mbajnë të mbërthyer publikun në shesh.

Një tjetër risi e këtij viti do të jetë organizimi i Festivalit të Muzikës Moderne në rrugët e Shkodrës në datat 6, 7 dhe 9 gusht. Ky do të jetë pas disa vitesh mungesë dhe edicioni i 7 premton emocione të bukura.

Gushti në këtë mënyrë do të jetë një muaj kryesisht i dedikuar muzikës në Shkodër dhe atmosferës në përgjithësi që krijon ajo për publikun e gjerë.