Hamas gati për armëpushim të ri

Një udhëheqës i lartë i Hamasit i tha kanalit televiziv të Katarit Al Xhazira se negociatat për lirimin e forcave të ushtrisë të kapura nga Hamasi mund të zhvillohen vetëm në kontekstin e një armëpushimi gjithëpërfshirës, në vend të një ndalimi luftimesh. “Kur bëhet fjalë për civilët, ne jemi të hapur për çdo armëpushim të ri” u shpreh ai.

 Al-Haxheh tha se disa të moshuar janë mes civilëve që mbahen peng nga grupi militant. Ndërsa bombardimet kanë rifilluar, ushtria izraelite hodhi fletëpalosje duke paralajmëruar banorët e Gazës jugore që të largohen për sigurinë e tyre. Banorët e qytetit Khan Junis janë paralajmëruarqë të shkojnë drejt Rafahut pranë kufirit me Egjiptin.

Ajo ka krijuar një hartë të re, që për herë të parë është me kod QR, e cila është projektuar për t’u mundësuar banorëve të Gazës të orientohen dhe të kuptojnë udhëzimet e të evakuohen nga vende specifike për sigurinë e tyre nëse u kërkohet, ndërsa trupat ushtarake përgatiten për fazën tjetër të luftimeve.

Rinisja e sulmeve në Gaza ishte ajo që i frikësoheshin më shumë edhe agjencitë e ndihmës së OKB-së. Një ekip i Organizatës Botërore të Shëndetësisë në Gaza i përshkroi skenat në spitalet e këtij territori si të tmerrshme. Ndërsa Unicef bëri thirrje për një armëpushim të qëndrueshëm, duke paralajmëruar se “mosveprimi në thelb është një miratim për vrasjen e fëmijëve”. Ministria e Shëndetësisë e drejtuar nga Hamasi thotë se mbi 100 persona u vranë që nga përfundimi i armëpushimit të përkohshëm.

Ndërsa Qeveria e Katarit konfirmoi se po vazhdojnë bisedimet midis Hamasit dhe Izraelit për të rifilluar armëpushimin. Në 7 ditë u liruan më shumë se 100 pengje në këmbim të 240 të burgosurve palestinezë nga burgjet izraelite.