Hapet Ankandi Fotovoltaik Hibrid 300 MWh, Balluku: 17 maji, afati i fundit për paraqitjen e ofertave. Fituesi më 10 korrik

Është hapur sot Ankandi Fotovoltaik Hibrid 300 MWh, një burim për prodhimin e energjisë së gjelbër. Zëvendëskryeministrja, njëherësh Ministrja e Infrastrukturës dhe Energjisë, Belinda Balluku tha gjatë fjalës së saj se afati përfundimtar i këtij ankandi është data 10 korrik, kur do të shpallet fituesi, ndërsa ofertat duhet të paraqiten deri më 17 maj. Balluku u kujdes të theksonte se nuk do të ketë shtyrje të afatit.  

“Sot quhet dita e lacncimit e cila do të zgjasë deri më 10 korrik që do të jetë afati përfundimtar i daljes së fituesve të kësaj gare që nis sot. Ofertuesit do kenë kohë deri më 17 maj për paraqitjen e ofertave teknike dhe atyre financiare”, u shpreh Ministrja.

Balluku bëri me dije se kapaciteti minimal i ofruar do të jetë 10 MWh, ndërsa ai maksimal do të jetë 100 MWh. Ndërkohë, çmimi maksimal i pranueshëm në këtë garë do të jetë 59.97 euro për MWh.

“Ky ankand quhet hibrid, sepse kështu quhen ato ankande ku shteti shqiptar është i gatshëm për të blerë energjinë nga këto ankande për një afat të kufizuar, konkretisht 15 vite, por pa angazhuar asetet të tjera, ndërsa në ankandin e sotëm shteti blen energji dhe është detyra e ofruesit të marrë masa qoftë për truallin, prodhimin, teknologjinë që do të përdoret dhe gjithçka. Kapaciteti minimal i ofruar do të jetë 10 MWh, ndërsa maksimal do të jetë 100 MWh, duke i dhënë kështu mundësi që pjesë e këtij ankandi të jenë minimalisht 3 entitete, pra duke qenë se në total ne do të kemi 300 MWh që duhet të jenë të disponueshëm për blerje nga shteti shqiptari. Çmimi maksimal i pranueshëm në këtë garë do të jetë 59.97 euro për MWh”, theksoi Ministrja.