Hernia diskale, neurologu Artur Xhumari zbulon shenjat dhe mënyrën si ta kuroni

Shefi i Neurologjisë në QSUT, Artur Xhumari, në një intervistë për “Mirëmëngjesi Shqipëri” u shpreh se dhembja e këmbës që nis nga mesi dhe përfundon në majat e gishtave, është hernie diskale.

Xhumari bëri me dije se në 7-80% të rasteve, kjo hernie kalon vetë, ndërsa ka dhe një 20% në të cilën nevojitet ndërhyrja kirurgjikale.

“Shumica e rasteve, kur themi një dhembje këmbe që fillon nga mesi dhe përfundon te maja e gishtave, është hernie diskale.

Disku është një si kuzhinietë mes dy rruazave që ka kurrizi jonë, që kur del nga vetja krijon hernien.

70-80% të rasteve shkaktohet vetë. Ka një 20% ku hernia ka qenë shumë e madhe, nuk ka arritur të thahet sa duhet, kanali ku kalojnë nervat është i vogël, gjëra që bëjnë që nuk shërohet me kalimin e kohës dhe duhet operacioni”, u shpreh Xhumari.

Ky i fundit theksoi se një prej shenjave të hernies diskale, është dhembja e mesit.

“Keqpërdorimi i kurrizit, shkaktari kryesor. Nëse përkulemi për të marrë diçka dhe e ngremë peshë me kurriz, shkakton dhembje, e vrasim dhe shkaqet që të bëjë hernie janë më të mëdha.

Hernia kur del nga disku nuk rikthehet pas. Ne kurojmë dhembjen me qetësues. Nëse pas 2-3 muajsh kjo dhembje nuk kalon, atëherë bëjmë operacion, dhe heqim hernien që doli dhe s’është në vendin e vetë.

Koha kur duhet bërë kjo punë është kur dhembja kthehet në pengesë në jetën e përditshme”, u shpreh ai.

Pyetur mbi pasojat që mund të ketë ndërhyrja kirurgjikale, Xhumari u shpreh se shanset që dikush mund të mbetet i paralizuar janë të vogla, por reale.

“Janë shumë të vogla shanset, por janë reale. Jo nga nervi shiatik, por hernia, e cila nëse del shumë e madhe, vret shumë nerva.

Dhe kur vriten shumë nerva ndodh paraliza e të dy këmbëve, shoqëruar me paraliza të urinimit dhe mpirje nga mesi e poshtë.

Kur del një hernie e vogël në cep, jep një dhembje që durohet, por kur del hernie e madhe, bën dëm të madh”, theksoi Xhumari.