“Histori Sportive” në RTSH Shkodra, Gjon Shyti, ish- notari dhe trajneri kampion me Kombëtaret e Italisë dhe Turqisë

Gjon Shyti, një emër i spikatur sportit shkodran e më gjërë, ishte personazhi kryesor i emisionit “Histori Sportive”, transmetuar mbrëmjen e së premtes në ekranin e RTSH Shkodra.

 Me një traditë familjare sportive nga Shiroka e famshme e sportit të notit, ka qënë pjesë e ekipeve të Vllaznisë në not që në vitin 1973, nën drejtimin e trajnerit të njohur Halim Zaganjori dhe më vonë Shuajp Mehmeti.

Një notar që aplikonte të gjitha stilet, por më së shumti preferonte atë bretkosë, duke dhënë kontributin e tij në sukseset e vazhdueshme të Vllaznisë së asaj periudhe, por edhe të KS Partizani për dy vite me radhë.

 Ajo që e bën më të veçantë figurën sportive të Gjon Shytit është karriera e tij tejet e pasur si trajner, gjë të cilën, përpos ekipit të Vllaznisë, spikat si trajner shumë i suksesshëm, fillimisht në Itali dhe më pas në Turqi.

Madje, krahas klubeve sportive të notit, Federata Italiane e Notit i beson drejtimin e Kombëtares, ku aftësitë e tija profesionale bëjnë që rezultatet pozitive të mbërrijnë kulmet, aq sa në konkurimet me sportistët e tij arrin të fitojë mbi 1 mijë medaljeve kombëtare dhe 60 ndërkombëtare, mes të cilave edhe me Luka Marin, notar i famshëm Italian, fitues i shumë trofeve  Europiane dhe botërore. Kombëtarja Italiane nën drejtimin e Gjon Shytit, arrin të shpallet 3 herë nënkampione bote, si dhe duke fituar medalje të shumta edhe në Lojrat Olimpike të Athinës, etj.

 Fama e marrë me Kombëtaren italiane bën që në adresë të trajnerit Gjon Shyti të mbërrijë oferta nga Turqia, atje ku do të vijonte sukseset e tij të njëpasnjëshme  duke e ngritur Kombëtaren turke në një nivel të lartë cilësor, përkrah ekipeve më në zë të Europës dhe më gjërë.