Hyjnë në fuqi tarifat e vendosura nga Trump për çelikun dhe aluminin
Tarifat e vendosura nga presidenti amerikan Donald Trump për importet e çelikut dhe aluminit hynë këtë të mërkurë (12 mars) në fuqi, në një lëvizje që ka të ngjarë të përshkallëzojë tensionet me disa nga partnerët më të mëdhenj tregtarë të Amerikës.
Veprimi i presidentit amerikan për të rritur masat mbrojtëse për prodhuesit amerikanë të çelikut dhe aluminit vendosi tarifa prej 25% për të gjitha importet e metaleve, gjë që ka të ngjarë të rrisë koston e prodhimit të çdo gjëje, nga shtëpitë tek pajisjet shtëpiake dhe automjetet e deri te kanaçet e pijeve, duke kërcënuar kështu rritjen e çmimeve të konsumit.
Trump shpreson se tarifat do të nxisin prodhimin e çelikut dhe aluminit në SHBA, por kritikët thonë se ky vendim do të dëmtojë rritjen ekonomike.
Komisioni Evropian iu përgjigj menjëherë vendimit, duke thënë se do të vendosë kundër-tarifa mbi 26 miliardë euro (28 miliardë dollarë) mallra amerikane nga muaji i ardhshëm.
Nga ana tjetër venndimi i Trump u përshëndet nga Instituti Amerikan i Hekurit dhe Çelikut (AISI), një grup që përfaqëson prodhuesit e çelikut në SHBA, sipas të cilëve kjo rritje do të nxisë prodhimin vendas të çelikut.
SHBA është importues kryesor i aluminit dhe çelikut, dhe Kanadaja, Meksika dhe Brazili janë ndër furnizuesit më të mëdhenj të metaleve.
Trump ka kërcënuar gjithashtu me më shumë tarifa më 2 prill për industrinë e makinave që “në thelb, do të mbyllnin përgjithmonë biznesin e prodhimit të automobilave në Kanada”.
