Hyn në fuqi ligji që i hap rrugë ndërtimit të centraleve diellore në toka kullotë

 Fondi kullosor në Shqipëri përfaqëson një pjesë të rëndësishme të tokave bujqësore, të cilat përdoren për blegtorinë, sidomos për kullotjen e bagëtive. Këto toka përbëjnë një pjesë të rëndësishme të tokave të destinuara për aktivitet bujqësor dhe blegtoral në vend. Fondi kullosor publik dominon me rreth 320,000-340,000 hektarë, ndërsa fondi privat zë rreth 60,000-80,000 hektarë.

Po tashmë sipas ndryshimeve të bëra në ligjin për “Fondin kullosor”, ndryshime të cilat kanë hyrë në fuqi me botimin në Fletoren Zyrtare, do të lejohet ndërtimi i centraleve diellore dhe atyre të erës.

Ndryshimet në këtë ligj u miratuan në Kuvend pas kërkesës së deputetes së Partisë Socialiste, Edona Bilali e cila deklaron se “tashmë ashtu sikurse shumë vende të BE edhe Shqipëria renditet mes vendeve që optimizon burimet e veta duke lejuar aktivitetet e energjisë së rinovueshme në toka kullotë”.

Sipas këtyre ndryshimeve, sipërfaqe tokash të fondit kullosor mund të jepen në përdorim për të zhvilluar në to veprimtari shoqërore, shëndetësore, sportive e turistike dhe për prodhimin e energjisë së rinovueshme.

Në ligjin e publikuar në Fletoren Zyrtare saktësohet se për lejimin e ushtrimit të veprimtarive që lidhen me prodhimin e energjisë së rinovueshme në fondin kullosor shtetëror do jenë njësitë e qeverisjes vendore që do të ndjekin procedurat ligjore përkatëse për dhënien e së drejtës së përdorimit.

Gjatë propozimit të kësaj nisme, deputetja Bilali ëhstë shprehur se se menaxhimi i fondit kullosor në vendin tonë, i cili përbëhet prej 506 288 ha, prej të cilave 60% janë në pronësi shtetërore, ndeshet me disa sfida ndër të cilat më kryesorja është fragmentizimi i parcelave.

“Një nga avantazhet potenciale të tokave rurale dhe malore është përdorimi i tyre për energji të rinovueshme nëpërmjet paneleve fotovoltaike. Duke qenë se Shqipëria ka të disponueshme një hapësirë të konsiderueshme fondi kullosor dhe ka si objektiv rritjen e prodhimit të energjisë nga burime të rinovueshme, përdorimi i kullotave si për prodhimin bujqësor e blegtoral ashtu edhe për prodhimin e energjisë së rinovueshme do të ishte një skenar ‘fito-fito’ për ekonominë e vendit tonë. Përdorimi i paneleve fotovoltaike, është pjesë e përpjekjeve për të promovuar energjinë e gjelbër dhe për të shfrytëzuar hapësirat natyrore të papërdorura për qëllime energjetike”, ka nënvizuar Bilali.

Sipas saj, me këto ndryshime ligjore mundësohet përdorimi i  dyfishtë i sipërfaqeve të fondit kullosor, si për kullota edhe si burim për prodhimin e energjisë alternative, të gjelbër.

Panelet diellore janë instaluar në një lartësi prej 5 metrash nga sipërfaqja e tokës, me qëllim që të mundësohet përdorimi i saj lirisht për ushqimin e bagëtive. Praktika të suksesshme të kësaj mënyre shfrytëzimi të sipërfaqes kullosore vijnë nga Gjermania, Austria, Franca, Holanda dhe Italia, ku ky sistem aplikohet prej vitesh.