I ftohti arktik në SHBA – Regjistrohen 9 viktima, 4 nga hipotermia

Një stuhi e fortë arktike përfshiu disa shtete jugore në Shtetet e Bashkuara, duke sjellë reshje të dendura bore, të parat në disa dekada për shumë zona dhe njëkohësisht temperatura ekstreme të ulëta. Të paktën katër persona dyshohet se humbën jetën nga hipotermia për shkak të të ftohtit arktik.

Sipas raportimeve nga mediat amerikane viktimat u regjistruan në Wisconsin, Teksas dhe Xhorxhia, ndërsa pesë persona humbën jetën në Teksas në një aksident që dyshohet se u shkaktua nga ngricat në rrugë. Reshje të dendura të borës në Florida dhe Alabama theu rekordet që datojnë që nga viti 1895, ndërsa New Orleans u mbulua nga reshjet më të mëdha të borës që nga viti 1963. 

Shërbimi Kombëtar i Motit në SHBA njoftoi se i ftohti ekstrem do të vijojë gjatë gjithë javës. Në të gjitha shtetet jugore  autostradat u mbyllën për shkak ngricave gjithashtu edhe shkollat. Reshjet masive të borës prekën edhe trafikun ajror, ndërsa këtë të mërkurë u raportuan mbi 1300 fluturime të pezulluara nga dy aeroporte në Hjuston.