I ngarkuari me punë i SHBA takon kreun e ri të AMP: Llogaridhënia, thelbësore

Kreu i ri i Agjencisë së Mbikëqyrjes Policore, Florian Sulejmani, ka zhvilluar një takim me të Ngarkuarin me Punë të ambasadës së SHBA-së, David Uisner (o. Wisner) dhe ekspertët e zbatimit të ligjit.

Në një postim në Facebook, ambasada e SHBA shkruan se Uisner vlerësoi rolin në rritje të agjencisë për forcimin e mekanizmave të mbikëqyrjes së zbatimit të ligjit.

Në postim, Ambasada e SHBA shkruan se llogaridhënia e vërtetë është thelbësore për ndërtimin e besimit te Policia e Shtetit.

“Në takimin e tij të parë me kreun e ri të Agjencisë së Mbikëqyrjes Policore, Florian Sulejmani, i Ngarkuari me Punë, David Wisner, dhe ekspertët e zbatimit të ligjit të Ambasadës së SHBA në Tiranë vlerësuan rolin në rritje të agjencisë në forcimin e mekanizmave të mbikëqyrjes së zbatimit të ligjit dhe rritjen e transparencës, llogaridhënies dhe efikasitetit brenda organeve ligjzbatuese të vendit. Llogaridhënia e vërtetë është thelbësore për ndërtimin e besimit te forca policore shqiptare dhe ne do të vazhdojmë të punojmë me drejtuesit e organeve të zbatimit të ligjit në Shqipëri për të zgjeruar këtë kapacitet,” shkruhet në postim.

Sulejmani u emërua në krye të AMP-së pas dorëheqjes së Ardi Veliut.