Inter, Inzaghi përgatitet për Bayern-in: Më shumë krenari se tension

Interi do të përballet me Bayern në ndeshjen e dytë të çerekfinales së Ligës së Kampionëve. Në San Siro, zikaltërit do ta nisin nga epërsia 2-1 të arritur në ndeshjen e parë, një avantazh që djemtë e Simone Inzaghit do të duhet ta mbrojnë për të arritur në gjysmëfinale dy vjet pas herës së fundit.

“Nuk ka tension, por më shumë krenari për atë që po bëjmë këtë sezon – komentoi trajneri në konferencën për shtyp -. Në ndeshjen e parë bëmë një paraqitje të madhe, të cilën duam ta përsërisim në San Siro, por do të jetë akoma më e vështirë”.

“Do të jetë shumë e vështirë kundër Bayernit dhe duhet të harrojmë rezultatin e ndeshjes së parë, por jo performancën. Ne e dimë vlerën e kundërshtarit tonë dhe do të na duhet një lojë e madhe vrapimi dhe agresioni për këtë çerekfinale”.

“Nuk janë vetëm anësorët e Bayernit që janë të fortë, por i gjithë ekipi. Pastaj kanë një trajner që e kam respektuar shumë edhe si lojtar dhe që në një kohë të shkurtër tashmë i ka dhënë skuadrës parimet e tij të qarta të lojës. Duhet të luajmë mirë teknikisht për ta mbajtur topin sa më shumë”.