Interesi për turizmin kulturor – Ura e Mesit, ndër objektet më të vizituara në Shkodër
Ndodhet vetëm 8 kilometra nga Shkodra dhe është një atraksion turistik i rëndësishëm për rajonin.
Fjala është për Urën e Mesit në njësinë administrative Postribë e cila edhe në muajin nëntor po vizitohet nga turistët e shumtë, kryesisht të huaj.
Këtë të martë, shumë prej tyre kishin zgjedhur të vizitojnë këtë monument kulture dhe të shijojnë bukuritë natyrore të zonës.
“Jam Kinga, vij nga kryeqyteti i Polonisë Varshava. E vizitoj për herë të parë Shqipërinë, është një vend jashtëzakonisht i bukur. Po kalojmë një eksperiencë të paharrueshme këtu. Koha është shumë e mirë, ndërsa pamja e jashtëzakonshme.
Ura e Mesit duket se ka një histori të jashtëzakonshme. Kemi ardhur me disa miq dhe po shijojmë vendet më të bukura që Shkodra ka.
-Unë jam Alina, nga Polonia. Më duket shumë bukur si vend, të cilin e vizitoj për herë të parë. Ne sapo kemi mbërritur dhe po shohim këtë zonën ku ndodhemi. Do të bëjmë një vështrim të përgjithshëm në zonës në fjalë, por edhe të objekteve të tjera historike dhe të trashigimisë kulturore që të ofron Shkodra”, shprehen turistët.
Ura e Mesit është ndërtuar nga Mehmet Pashë Bushati në vitin 1768 dhe është ura më e madhe që mbetet nga periudha osmane në Shqipëri.
Elementët e saj e bëjnë këtë urë jo vetëm piktoreske, por edhe me vlerë arkitekturore.
