Ish-informatori i FBI-së i akuzuar për gënjeshtra për Bidens do të paraqitet në gjykatë, gjyqtari do të peshojë paraburgimin e tij

Një ish-informator i FBI-së i akuzuar për fabrikimin e një skeme ryshfeti shumëmilionëshe që përfshin familjen e Presidentit Joe Biden, do të paraqitet në një gjykatë federale të Kalifornisë të hënën, ndërsa një gjykatës do të shqyrtojë nëse ai duhet të qëndrojë pas hekurave ndërsa pret gjykimin.

Zyra e këshilltarit të posaçëm David Weiss po i bën presion gjykatësit të qarkut të SHBA Otis Wright II që ta mbajë Alexander Smirnov në burg, duke argumentuar se njeriu që pretendon se ka lidhje me inteligjencën ruse ka të ngjarë të largohet nga vendi.

Një gjykatës tjetër javën e kaluar e liroi Smirnovin nga burgu për monitorimin elektronik GPS, por Wright urdhëroi që burri të ri-arrestohej, pasi prokurorët kërkuan të rishqyrtonte ndalimin e Smirnovit. Wright tha në një urdhër me shkrim se përpjekjet e avokatëve të Smirnovit për ta liruar atë “ka të ngjarë të lehtësonin arratisjen e tij nga Shtetet e Bashkuara”.

Në një peticion urgjent pranë Gjykatës së Apelit, avokatët e Smirnov thanë se gjykatësi Wright nuk ka autoritet për të urdhëruar arrestimin e serishëm të tij. Ekipi mbrojtës po ashtu kritikoi ato që i cilësoi si “deklarata të njëanshme dhe paragjykuese” të gjykatësit Wright, të cilin po ashtu e akuzon për shpifje ndaj avokatëve mbrojtës, që sipas gjykatësit, po vepronin në kundërshtim me rregullat duke u angazhuar për lirimin e klientit të tyre.

Ndaj ish informatorit Smirnov është ngritur padi për dhënien e informacionit të rremë FBI-së, duke pretenduar se drejtuesit e kompanisë Burisma i kishin paguar nga 5 milionë dollarë Joe Biden dhe të birit të tij Hunter rreth vitit 2015. Pretendimet e informatorit janë pjesë e rëndësishme e përpjekjeve republikane në Kongres për të hetuar presidentin dhe familjen e tij dhe u përdorën për të filluar hetimet në Dhomën e Përfaqësuesve për ngritjen e akuzave për shkarkimin e presidentit Biden.

Në përpjekjet për të bindur gjykatësin që ta mbajë në paraburgim Smirnov, prokurorët thanë se ky person i ka raportuar FBI-së se ka pasur kontakte me zyrtarë të lidhur me shërbimet ruse të zbulimit. Në dokumentet e gjyqit, prokurorët deklaruan javën e kaluar se ish informatori Smirnov u ka thënë hetuesve pas arrestimit të tij të parë se zyrtarët e lidhur me shërbimin rus të zbulimit ishin të përfshirë në pohimin e fabrikuar që iu përcoll FBI-së për Hunter Biden.

Aktpadia ndaj ish informatorit Smirnov, i cili mban shtetësi amerikane dhe izraelite, është ngritur nga i njejti prokuror i posaçëm i Departamentit të Drejtësisë që ka ngritur një aktpadi tjetër kundër Hunter Biden për armëmbajtje dhe për shmangie taksash.

Smirnov nuk ka pranuar fajësinë ndaj akuzave. Ekipi mbrojtës thotë se po kërkon mbrojtjen e tij në liri për shkak se ai nuk ka qënë ndonjëherë i dënuar më parë, si dhe ka lidhje të forta për të mos u larguar nga Shtetet e Bashkuara, përfshirë të dashurën e tij prej kohësh e cila jeton në Las Vegas.

Në vendimin e tij për ta liruar Smirnov javën e kaluar dhe për ta vendosur nën vëzhgim elektronik, gjykatësi Daniel Albregts në Las Vegas tha se ai është i shqetësuar për rrezikun që paraqet mundësia që ai të ketë qasje te fondet e tij, që prokurorët i llogarisin në 6 milionë dollarëve, por theksoi se rregullat federale e detyrojnë atë të zbatojë “kushte më pak kufizuese” para zhvillimit të gjyqit.

Smirnov ka shërbyer si informator i FBI-së për më shumë se një dekadë që kur bëri akuzat e bujshme rreth familjes Biden në qershor të vitit 2020. Sipas prokurorëve, ai kishte paragjykime ndaj zotit Joe Biden që në kohën kur ai ishte kandidat për president. Sipas dokumenteve të gjyqit, Smirnov ka hyrë në marrëdhënie biznesi me kompaninë ukrainase Burisma në vitin 2017. Deri më tani nuk ka prova se Joe Biden është korruptuar apo ka pranuar ryshfet gjatë kohës që po ushtron detyrën e presidentit apo kur ishte nën president.

Ndonëse identiteti i tij nuk ishte bërë publik para shpalljes së aktpadisë, pretendimet e Smirnov janë pjesë qendrore e përpjekjeve republikane në Kongres për ta hetuar presidentin dhe familjen e tij dhe kanë ndihmuar në nxitjen e asaj që tani përbën një proces hetimi për të shkarkuar Presidentin Biden. Republikanët që janë pjesë e këtyre hetimeve i kanë kërkuar FBI-së listën e paredaktuar të akuzave të pretenduara ndaj familjes Biden, ndonëse e pranojnë se ata nuk janë në gjendje t’i vërtetojnë ato nëse janë të vërteta. AP