Ish-reparti ushtarak i Rrencit , godinat janë kthyer në gërmadha! Rama: Pronat e ushtrisë për turizëm

Ish-reparti ushtarak në Rrenc të njësisë Guri i Zi në Shkodër është braktisur totalisht dhe duket që dita ditës po shkon drejtë shkatërrimit.

Në vitin 2017 u prezantua projekti për kthimin e këtyre godinave në qendër multifunksionale për emergjencat civile, por një gjë e tillë sot e kësaj dite nuk ka ndodhur.

Kryeministri Edi Rama njoftoi pak muaj më parë se Ministria e Mbrojtjes do të krijojë një departament të veçantë që do të merret me administrimin e pronave të ushtrisë e për t’i kthyer ato në burim të ardhurash për zonën dhe Ministrinë e Mbrojtjes.

Rama u shpreh se shteti nuk do të heqë dorë nga pronësia e këtyre pronave, të cilat nga zona të degraduara do të kthehen në një model inovativ për zhvillimin e turizmit.

Reparti ushtarak i Rrencit u braktis pas trazirave të dhunshme të vitit 1997 për t’u përdorur në vitin 2010 si qender e përbashkët për strehimin e disa qindra familjeve, banesat e të cilave u përmbytën nga reshjet dhe shkarkimet e hidrocentraleve të kaskadës së Drinit.

Tashmë, ndërtesat e ish- repartit ushtarak të Rrencit janë thuajse të shkatërruara për shkak të braktisjes prej më shumë se 2 dekadash, ndaj për shndërrimin e tyre në një qendër multifunksionale të emergjencave kërkohen fonde të konsiderueshme.

Nga projekti ambicioz, ky repart po shkon drejt shkaterrimit te pakthyeshëm, e që do të rriste koston e ndërhyrjes për shtetin.