Ishujt Paros dhe Mykonos përmbyten nga shirat e dendur, mbyllen shkollat

Ishujt e Egjeut Lindor janë goditur rëndë nga moti i keq, që ka sjellë shirat e dendur dhe stuhi të fuqishme, duke shkaktuar përmbytje masive dhe shkatërrime të mëdha. Moti ka shkaktuar rrëshqitje dherash dhe ka kthyer rrugët e ishujve në lumenj, duke marrë përpara automjetet dhe bllokuar qarkullimin në disa zona.

Ishulli i Paros ka pësuar dëmet më të mëdha nga përmbytjet. Kryetari i Bashkisë së Paros, Kostas Bizas, theksoi se “rrugët janë dëmtuar dhe ne kemi nevojë për ndihmë me më shumë makineri për të pastruar rrugët”. Ishujt Mykonos, Siros, Rodos, Kos dhe Symi janë gjithashtu prekur nga shirat e dendur.

Si pasojë e përmbytjeve, shkollat, kopshtet dhe transporti publik janë mbyllur deri në pastrimin e rrugëve të bllokuara nga dherat dhe mjetet që janë transportuar nga shirat. Mungesa e energjisë elektrike ka përfshirë shumë zona të ishujve, ndërsa Forcat e Armatosura dhe Administrata e Ndërtimit dhe Menaxhimit të Fatkeqësive Natyrore janë angazhuar për të ofruar ndihmë dhe për të liruar rrugët.

Bashkia e Mykonos ka apeluar për qetësi dhe bashkëpunim nga banorët, duke kërkuar që ata të ndjekin udhëzimet e autoriteteve për të siguruar sigurinë e gjithsecilit. Greqia është prekur shpesh nga përmbytjet vitet e fundit, ku shkencëtarët ia atribuojnë ngrohjes globale.