Izraeli do të nisë ofensivën në Rafah gjatë Ramazanit nëse pengjet e mbajtura nga Hamasi nuk lirohen

Izraeli do të nisë ofensivën e tij të kërcënuar prej kohësh kundër Rafah muajin e ardhshëm nëse Hamasi nuk ka liruar pengjet e mbetura të mbajtura në Gaza deri në fillim të Ramazanit. Deklarata është bërë nga anëtari i kabinetit të luftës izraelite, Benny Gantz i cili nuk specifikoi një datë mbi sulmin e planifikuar në qytetin ku shumica e 1.7 milionë palestinezëve të zhvendosur kanë kërkuar strehim

“Bota duhet ta dijë dhe udhëheqësit e Hamasit duhet ta dinë – nëse deri në Ramazan pengjet tanë nuk janë në shtëpi, luftimet do të vazhdojnë kudo, duke përfshirë zonën e Rafahut,” tha Gantz. Ramazani, muaji i shenjtë i myslimanëve, pritet të fillojë më 10 mars.

Gantz shtoi se një ofensivë do të kryhej në një mënyrë të koordinuar dhe në bisedë me amerikanët dhe egjiptianët për të lehtësuar një evakuim dhe “të minimizojë sa më shumë viktimat civile”.

Por se ku njerëzit mund të zhvendosen në mënyrë të sigurtë në Rripin e Gazës të rrethuar , mbetet e paqartë.

Frika për civilët ka bërë që qeveritë e huaja dhe organizatat e ndihmës t’i kërkojnë vazhdimisht Izraelit të mos hyjë në Rafah, qyteti i fundit i madh që nuk u pushtua nga trupat tokësore gjatë luftës katërmujore.

Pavarësisht presionit ndërkombëtar në rritje, duke përfshirë një thirrje të drejtpërdrejtë nga presidenti amerikan Joe Biden , kryeministri izraelit Benjamin Netanyahu këmbëngul se lufta nuk mund të përfundojë pa ushtruar presion në Rafah.