Izraeli kërkoi dorëheqjen e tij, Guterres: Sulmet e Hamasit, nuk justifikojnë ndëshkimin kolektiv të popullit palestinez

Sekretari i Përgjithshëm i Kombeve të Bashkuara, Antonio Guterres ka përsëritur thirrjen për lirimin e menjëhershëm dhe pa kushte të të gjitha pengjeve të mbajtur në Gaza.

Në kuadër të 78-vjetorit të hyrjes në fuqi të Kartës së OKB-së, Guterres u ndal te situata kritike mes Izraelit dhe Hamasit, duke u shprehur se ankesat e popullit palestinez nuk mund të justoifikojnë sulmet e tmerrshme të Hamasit, dhe se këto sulme nuk mund të justifikojnë ndëshkimin kolektiv të popullit palestinez.

“Sot është #Dita e OKB-së , duke shënuar 78 vjet nga hyrja në fuqi e Kartës së OKB-së. Në këtë orë kritike, u bëj thirrje të gjithëve që të tërhiqen nga pragu para se dhuna të marrë edhe më shumë jetë dhe të përhapet edhe më larg.

Karta e OKB-së– e cila hyri në fuqi 78 vjet më parë – i ka rrënjët në frymën e vendosmërisë për të shëruar ndarjet, për të riparuar marrëdhëniet dhe për të ndërtuar paqen. Ne jemi një botë e ndarë. Ne mund dhe duhet të jemi kombe të bashkuara.

Pas takimit me familjet, të dashurit e të cilëve janë marrë peng, unë rikonfirmoj thirrjen time për lirimin e menjëhershëm dhe pa kushte të të gjithë pengjeve të mbajtur në Gaza. Asgjë nuk mund të justifikojë vrasjen, plagosjen dhe rrëmbimin e civilëve nga Hamasi.

Situata në Lindjen e Mesme sa vjen e bëhet gjithnjë e më e rëndë. Në një moment vendimtar si ky, është jetike të jemi të qartë mbi parimin themelor të respektimit dhe mbrojtjes së civilëve.

Ankesat e popullit palestinez nuk mund të justifikojnë sulmet e tmerrshme të Hamasit. Ato sulme të tmerrshme nuk mund të justifikojnë ndëshkimin kolektiv të popullit palestinez”, shkroi Guterres në rrjetin social X.

Një ditë më parë (24 tetor), në takimin e posaçëm të Këshillit të Sigurimit të Kombeve të Bashkuara për krizën në Lindjen e Mesme, Guterres u shpreh se sulmet e Hamasit kundër Izraelit “nuk erdhën nga hiçi, populli palestinez i është nënshtruar pushtimit mbytës për 56 vjet”, edhe pse “vuajtjet e popullit palestinez nuk mund të justifikojnë sulmet e tmerrshme të Hamasit”.

Por kjo deklaratë e tij ngjalli zemërimin e Izraelit, ku ambasadori izraelit në Kombet e Bashkuara, Gilad Erdan, kërkoi dorëheqjen e Antonio Guterresit.