Izraeli, sulm tokësor në Gazë. BE thirrje për korridore humanitare

Gjatë së premtes, trupat tokësore të ushtrisë së Izraelit kryen një sulm të dytë kundër objektivave të Hamasit me avionë luftarakë dhe dronë, duke përfshirë zonat e lëshimit të raketave antitank, qendrat e komandës dhe kontrollit ushtarak, si dhe militantë të grupit palestinez.

Izraeli ka grumbulluar trupa jashtë Gazës që nga sulmi vdekjeprurës i Hamasit më 7 tetor, në të cilin rreth 1.400 njerëz u vranë dhe mbi 220 të tjerë u morën peng.

Ndërsa sipas Ministrisë së Shëndetësisë në Gazë mbi 7 mijë palestinezë kanë humbur jetën. 

Agjencia e OKB-së që ndihmon banorët palestinezë ka ngritur alarmin se një e treta e spitaleve dhe shumica e klinikave shëndetësore në Gazë janë mbyllur, ndërsa shtoi se 50 mijë gra janë shtatzënë dhe 5.500 prej tyre presin të lindin brenda muajit të ardhshëm.

Sipas agjencisë rreth 630 mijë persona janë zhvendosur brenda Gazës në strehimoret e saj.

Mbrëmjen e së enjtes, udhëheqësit e Bashkimit Evropian të mbledhur në samitin e Brukselit i bënë thirrje Izraelit për korridore humanitare dhe ndalim të bombardimeve në Gazë, që civilët palestinezë të mund të marrin ndihmat e nevojshme.

“Nuk ka asnjë përplasje mes solidaritetit ndaj Izraelit dhe nevojës së ndihmës humanitare për popullin e Gazës,” tha presidentja e Komisionit Evropian, Ursula fon der Lajen (o. von der Leyen) në një konferencë për shtyp.