Izraeli sulme raketore mbi Gaza, vriten 32 gra dhe fëmijë. Netanyahu niset drejt SHBA

Të paktën 32 persona, përfshirë gra dhe fëmijë, kanë humbur jetën si pasojë e sulmeve izraelite në Rripin e Gazës. Luftimet mes Izraelit dhe Hamasit janë intensifikuar, duke shkaktuar viktima të shumta mes civilëve palestinezë.

Sulmet ajrore dhe granatimet izraelite goditën disa zona të Gazës, përfshirë qytetin e Khan Younis dhe kampin e refugjatëve Jabaliya, ku u regjistruan viktima të shumta. Spitali Nasser njoftoi se në një sulm janë vrarë pesë burra, pesë gra dhe pesë fëmijë, ndërsa Ministria e Shëndetësisë e Gazës raportoi për katër viktima të tjera në Jabaliya. Një tjetër sulm në qytetin e Gazës, ku një raketë ra në një grup njerëzish që prisnin jashtë një furre buke, mori jetën e të paktën gjashtë personave, përfshirë tre fëmijë.

Në mes të kësaj vale sulmesh raketore, kryeministri izraelit, Benjamin Netanyahu, është nisur drejt Shteteve të Bashkuara të Amerikës, ku do të takohet me Presidentin Donald Trump për të diskutuar situatën dhe mundësinë e një marrëveshje për armëpushim. Gjatë vizitës, Netanyahu pritet të diskutojë edhe tarifën prej 17% që SHBA ka vendosur ndaj Izraelit, si pjesë e një vendimi global.

Këto zhvillime vijnë në një moment të tensionuar, pasi dhjetëra palestinezë kanë organizuar protesta në Jabaliya, duke kërkuar ndalimin e luftimeve dhe një marrëveshje paqeje. Po ashtu, konflikti ka shkaktuar një numër të madh viktimash mes civilëve, me mbi 50,000 të vdekur nga pala palestineze që nga fillimi i luftës në tetor 2023.

Në mes të këtyre tensioneve, SHBA ka mbështetur Izraelin dhe ka luajtur rol të rëndësishëm në përpjekjet ndërkombëtare për armëpushim, së bashku me Egjiptin dhe Katarin.