Izraeli sulmon Libanin, godet bankat e Hezbollahut

Izraeli ka kryer më shumë sulme ajrore në Bejrut dhe Libanin jugor, përfshi këtu degët e shoqërisë së bankës Al-Qard Al-Hassan. Shpërthime u dëgjuan në lagjen Dahieh të Bejrutit jugor, një zonë e kontrolluar nga Hezbollahu, si dhe në Luginën Bekaa dhe Libanin jugor. Nga shpërthimet janë shkaktuar dëme dhe viktima, ndonëse ende nuk është bërë me dije numri i saktë i tyre.

Ushtria izraelite më herët paralajmëroi sulmin gjatë natës në më shumë se 20 zona në Liban, duke përfshirë 14 në kryeqytetin Bejrut.

Forcat e Mbrojtjes së Izraelit (IDF) gjithashtu thanë se do të synonin bankat dhe infrastrukturën tjetër financiare që mbështesin Hezbollahun.

Në një deklaratë të lëshuar mbrëmjen e së dielës, zëdhënësi i IDF-së, admin Daniel Hagari paralajmëroi se “kushdo që ndodhet pranë vendeve të përdorura për financimin e aktiviteteve terroriste të Hezbollahut duhet të largohet menjëherë nga këto vende”.

“Ne do të godasim disa objektiva në orët e ardhshme dhe objektiva shtesë gjatë natës. Në ditët në vijim, ne do të zbulojmë se si Irani financon aktivitetet terroriste të Hezbollahut duke përdorur institucionet civile, shoqatat dhe OJQ-të që veprojnë si fronte për terrorizmin”, tha ai.

Izraeli akuzon shoqatën se ka dërguar para iraniane te grupi për të financuar blerjen dhe ruajtjen e armëve dhe për të paguar pagat e anëtarëve të saj. Institucioni ka qenë nën sanksionet e SHBA-së që nga viti 2007 dhe akuzohet nga zyrtarët amerikanë se është një mbulesë e Hezbollahut për të menaxhuar aktivitetet e tij financiare.

Ndërkohë, Hezbollah tha se kishte lëshuar më shumë raketa drejt Izraelit të dielën, duke synuar bazat ushtarake.