“Ju flet Agron Çobani”/ Për “Jetë Shqiptare”, prapaskenat e dokumentarit për drejtorin e RTSH
JU FLET COBANI
“Ju flet Agron Çobani”, dokumentari me regji nga Zhejniva Garo u transmetua vetëm pak ditë më parë ku familjarë, miq e bashkëpunëtorë të Çobanit sollën edhe njëherë tjetër figurën e tij me anë të kujtimeve që ruanin me të.
Çobani ka qenë një personalitet shumëdimensional, gazetar i spikatur, ndërsa për disa vite me radhë ka qenë drejtor i Radio Tirana dhe po ashtu drejtor i Radiotelevizionit Shqiptar.
Të ftuar në emisionin “Jetë shqiptare” regjisorja Zhejniva Garo, kompozitori Genti Lako dhe drejtori i fotografisë, Shkëlzen Sinani, treguan më shumë për realizimin e këtij dokumentari.
Regjisorja Garo tregoi kënaqësitë dhe sfidat rreth punimit të dokumentarit për ta sjellë atë për publikun.
“Ne jemi pjesë e këtij institucioni ku edhe pavetëdije punojmë për të sjellë në vëmendje, njerëz, personazhe, fakte. Unë shpresoj që jo vetëm Çobani por edhe bashkëpunëtorë të tjerë të kthehen me dokumentarë. Sapo e përmend automatikisht ke ndjenjë të lartë përgjegjësie pasi personaliteti i tillë ishte i tillë. Kisha merak të sillja atë gjitha drejt hijet e tij, dhe se çfarë do të mësonin brezi, sidomos të rinjtë.”
Regjisorja tha se me rëndësi ishte bashkëpunimi dhe mirëkuptimi nga ana e familjarëve të tij.
”Së bashku me Indrit Çobanin, i biri i Agron Çobanit, ishte personi i parë që më telefonoi dhe në premierë patëm një moment kur të dy po mundoheshim të trajtonim këtë gjë: po sikur Agron Çobani të shfaqej? Ndoshta do të na thoshte: i keni bërë mirë detyrat e shtëpisë. Mendoj që vështirësia më e madhe për mua, ose meraku ishte në fakt pikërisht me Indritin. E kam lënë gjatë momentin derisa vendosëm ta realizonim intervistën. Nuk është e thjeshtë të flasësh për atin dhe një figurë me kaq shumë dritëhije sa Agron Çobani. Agroni më së shumti i ka përkitur RTSH-së, miqve, padiskutim dhe familjes,” shton regjisorja.
Nga ana e tij Shkëlzen Sinani u shpreh se vetë Çobani me natyrën e tij ironike nuk do e mirëpriste këtë dokumentar.
“Kjo vepër është bërë me shumë dashuri. Jemi mundura t’i përcojmë idetë e Iva Garos, pra regjisores. E kam njohur Agronin. Përjetoj entuzjazmin që ka përjetuar televizioni. Ai dokumentarin do e shihte me ironi. Nuk besoj se do e kishte dashur këtë dokumentar, do nënqeshte dhe do vijonte të punonte,” u shpreh Sinani.
Kompozitori Lako tregon që e ka mirëpritur dokumenatarin duke pranuar që ishte personazh me përgjegjësi.
“Unë hyj te ata muzikantë, autorë që vetëm filmit nuk i them jo. Ishte diçka që mezi e prita dhe shumë përgjegjësi e madhe si do pritet. Them se jam kam dalë mirë duke shkrirë diçka timen me diçka të vjetër. Ka qenë përgjegjësi,” tha ai.
