Kamala Harris mban fushatën në Xhorxha, shfaqet krah Barak Obamës

Zëvendëspresidentja Kamala Harris është shfaqur gjatë fushatës së saj në Xhorxha së bashku me ish-presidentin Barak (Barack) Obama.

Në fjalën e saj, Harris preku një sërë temash, sikurse droga, strehimi dhe sendet ushqimore.

“E jona është një luftë për të ardhmen. Unë vij nga klasa e mesme dhe nuk do ta harroj kurrë se nga vij. Kujdesi shëndetësor duhet të jetë një e drejtë dhe jo vetëm një privilegj për ata që mund ta përballojnë atë”, deklaroi Harris ndërsa shtoi se kundërshtari i saj Donald Tramp (Trump) do të prishë ligjin rreth kujdesit shëndetësor të përballueshëm dhe do të heqë kufirin prej 35 dollarësh për insulinën.

Kandidatja demokrate riafirmoi mbështetjen e saj për të drejtat e abortit, duke iu referuar vdekjes së Amber Nikol (Nicole) Thurmanit, një gruaje nga Xhorxha, vdekja e së cilës u zbulua kohët e fundit se erdhi si rezultat i politikave të shtetit kundër abortit.

“Donald Tramp ende refuzon të pranojë dhimbjen dhe vuajtjen që ka shkaktuar … grave u mohohet kujdesi gjatë abortit”, deklaroi Harris.