Kampionati Kombëtar i kategorisë së dytë, fitojnë Besëlidhja, Veleçiku dhe Tërbuni. Lezhjanët kryesues

Java e 17-të e Kampionatit Kombëtar të futbollit për kategorinë e dytë, Grupi A ka përballur Murlanin me Veleçikun. Derbi verior, i luajtur në fushën sportive të Barbullushit është dominuar nga Veleçiku me rezultatin 0 me 3.  Për koplikasit kanë shënuar Kacokaj, Stafa, Shekaj, përkatësisht në minutat 6, 36 dhe 42-të. Edhe pse ka luajtur brenda, Besëlidhja, ka vuajtur shumë për të mundur Sopotin me rezultatin 1 me 0. Për lezhjanët, golin e fitores e ka shënuar Gjikolaj në minutën e 77-të, duke bërë që Besëlidhja të marrë tre pikë shumë të rëndësishme. Me fitore e ka mbyllur ndeshjen e javës së 17-të edhe Tërbuni, i cili duke luajtur në transfertë mundi Naftëtarin me rezultatin e pastër, 0 me 2. Për pukjanët, golat u shënuan nga Gjini dhe Tabaku përkatësisht në minutat 12-të dhe në të 78-të. Realisht, Tërbuni nuk po kalon një moment të mirë pasi ndryshe nga sa parashikohej për momentin nuk është favorit për kalimin në kategorinë e parë. Lënia e shumë pikëve për pukjanët, si brenda në “Ismail Xhemali”, si dhe jashtë në ndeshjet e transfertës, kanë bërë që Tërbuni të mos jetë lidër i grupit A. Gjë të cilën e kanë marrë përsipër Besëlidhja dhe Valbona që pas javës së 17-të kryesojnë me 43 dhe 40 pikë. Poshtë tyre në vendin e tretë është Iliria me 37 pikë dhe në vend të katërt është Tërbuni me 25 pikë. Vetëm një pikë më pas është Sopoti i Librazhdit, ndërkohë që në vendin e gjashtë është Veleçiku. Java e 18-të e Kampionatit Kombëtar të futbollit për kategorinë e dytë luhet me 30 mars ku spikasin përballjet Veleçiku-Besëlidhja dhe derbi i qarkut Shkodër, Tërbuni-Murlani.