Kategoria e dytë e futbollit/ Fiton Tërbuni, humbin Veleçiku dhe Murlani

Sezoni sportiv 2023-2024 për Kampionatin Kombëtar të futbollit për kategorinë e dytë duket se është ndër më të fortit i të gjithë atyre të mëparshëm. Lufta sportive dhe rivaliteti për të marrë një biletë kualifikuese për në kategorinë e parë, sidomos në grupin A ku luajnë edhe tre skuadrat e qarkut Shkodër, është e ashpër. Kjo, edhe për faktin se këtë edicion kemi të bëjmë me disa skuadra që e kërkojnë një gjë të tillë. Mjafton të përmendim ekipe të tilla si Tërbuni i Pukës, Besëlidhja e Lezhës, Iliria e Fushë Krujës, Veleçiku i Koplikut, të cilët kanë një përvojë të gjatë në kategorinë e parë, por edhe më lartë në Superiore, këtë sezon kërkojnë kalimin në të parën. Duke i shtuar këtu edhe Valbonën e Tropojës, e cila me merkaton cilësore me element nga Superliga, lista e konkurentëve bëhet edhe më e madhe. Referuar javës së katërt, ekipet në fjalë dolën fituese të ndeshjeve të tyre duke bërë një hap përpara në këtë drejtim. Kështu, Tërbuni i Pukës ka fituar me rezultatin 2 me 0 ndaj KF Albanet falë golave të shënuar nga Tabaku në minutën e 48-të dhe shkodrani Jurgen Gjini në minutën e 88-të. Me fitore e ka mbyllur këtë javë edhe Besëlidhja e Lezhës, e cila sfidoi Naftëtarin me rezultatin 3-1. Ndërkohë, Murlani, duke luajtur në transfertë u mund 5-0 nga Sopoti i Librazhdit. Fitore 5-0 ka regjistruar edhe Valbona e Tropojës ndaj Adriatikut. Me shumë interes është pritur përballja në mes Veleçikut të Koplikut dhe Ilirisë së Fushë Krujës. Takimi i luajtur në fushën sportive të Koplikut është mbyllur me fitoren 3 me 4 nga ana e skuadrës mike, ku goli i fitores për fushëkrujasit është shënuar në minutën e 100-të. Një humbje kjo e Veleçikut që ka sjelë pakënaqësi të shumta në radhët e tifozërisë koplikase, e cila në fund të ndeshjes ka reaguar ndaj drejtuesve dhe vetë futbollistëve për mosimpenjimin sipas tyre në minutat e fundit të ndeshjes.