KE i kërkon Maqedonisë V. të shpejtojë ndërtimin e Korridorit Hekurudhor 8 me Bullgarinë

Komisioni Evropian i ka kërkuar Maqedonisë së Veriut të përshpejtojë ndërtimin e Korridorit Hekurudhor 8, me theks të veçantë te shpallja e tenderit për ndërtimin e fazës së tretë të hekurudhës drejt Bullgarisë.

Është kjo vetëm një pjesë e rekomandimeve kryesore të KE-së në kapitujt për transportin dhe korridoret trans-evropiane në Raportin e fundit për vitin 2023 për progresin e Maqedonisë së Veriut në rrugën e saj drejt integrimeve evropiane.

Në Raport thuhet se përgatitjet për shpalljen e dokumentacionit të tenderit për fazën e tretë të ndërtimit të hekurudhës drejt Bullgarisë po vonojnë dukshëm. 

Nga Ministria e Transportit dhe Lidhjeve sqarojnë se do të veprojnë sipas rekomandimit të Komisionit Evropian, përkatësisht shtojnë se tashmë është përgatitur procedura e tenderit për ndërtimin e fazës së tretë të lidhjes hekurudhore me Bullgarinë.

“Ajo është e harmonizuar institucionalisht dhe i është dorëzuar për miratim Delegacionit të Bashkimit Evropian, sepse një pjesë e mjeteve për ndërtimin e kësaj hekurudhe sigurohen përmes komponentit IPA,” thanë nga Ministria e Transportit dhe Lidhjeve.

Kritika nga Komisioni Evropian ka edhe për pjesën e ndërtimit të autostradës së Korridorit 8 nga “Bechtel-Enka”, para së gjithash në drejtim të sigurimit të procedurave transparente për prokurimet qeveritare, si dhe për ndryshimet ligjore që u miratuan nga Kuvendi në Maqedoni me flamur evropian, pra me një procedure të shkurtuar, për ta përshpejtuar ndërtimin e pjesëve të autostradës.

“Amendamentet për përshpejtimin e ndërtimit të katër pjesëve të autostradës përgjatë Korridoreve 8 dhe 10-d u miratuan në maj të vitit 2023 duke e përdorur procedurën e shkurtuar “flamuri i BE-së”, edhe pse ky nuk ishte një përdorim i duhur i procedurës. Nga Maqedonia e Veriut pritet që t’i respektojë detyrimet që burojnë nga Marrëveshja e Stabilizim Asociimit, si dhe të ruajë harmonizimin me të drejtën e BE-së gjatë procesit të negociatave për anëtarësim,” thuhet në Raportin për progresin e Maqedonisë së Veriut për vitin 2023.

Komisioni Evropian kritikon se nuk kanë përfunduar procedurat për vendosjen e vendkalimeve të përbashkëta hekurudhore me fqinjët, përfshirë Kosovën, Serbinë dhe Greqinë. Kërkon që të zbatohen dispozitat e protokollit për kalimin e përbashkët kufitar hekurudhor me Kosovën, si dhe të arrihet marrëveshje me Greqinë për krijimin e një kalimi të përbashkët hekurudhor Kremenicë-Neos Kafkasos. Në të njëjtën kohë ka kritika se deri më sot nuk janë rregulluar financat për pikën e përbashkët kufitare me Serbinë në afërsi të Tabanocit.

Lidhur me këto vërejtje nga Ministria e Transportit dhe Lidhjeve sqarojnë se janë nënshkruar të gjitha protokollet për hapjen e pikës së përbashkët kufitare hekurudhore me Kosovën dhe e vetmja gjë që pritet është që Kosova ta përfundojë rikonstruktimin e infrastrukturës hekurudhore në territorin e tyre. Për pikëkalimin e përbashkët hekurudhor me Greqinë bëjnë me dije se vendi ka dërguar iniciativë për këtë projekt në Greqi, por që nga ana e tyre ende nuk ka asnjë përgjigje. /Zhurnal