Kejn thyen rekordin 59-vjeçar në Mynih

Shumë mendonin se shifra e paguar nga Bajerni për një sulmues që sapo kishte mbushur 30 vjeç ishte e ekzagjëruar, por koha dhe Kejn u ka dhënë të drejtë drejtuesve të klubit bavarez.

Në fitoren e bujshme përballë Bohumit, Kejn dha kontributin e vet duke ndihmuar dy shokë të skuadrës për të shënuar gol dhe duke realizuar plot tre të tillë vetë. Me “trisin” e djeshëm Kejn vendos një standard të ri, një rekord të cilin më parë e mbante legjenda e skuadrës Gerd Myller.

Në 1964-ën e largët Myler kishtë shënuar pesë gola në pesë ndeshjet e para me Bajernin. Këtë rekord askush nuk e kishte “prekur” më pare, vetëm Miroslav Klose dhe Mario Manxhukiç i kishin shkuar pranë duke e barazuar.

U desh blerja e një sulmuesi si Harri Kejn për të përmirësuar shifrat e “Bomberit  të Kombit” siç njihet ndryshe Gerd Myleri në Mynih. Anglezi në pesë ndeshjet e para në Bundesligë numëron plot 7 gola.

“Kemi zhvilluar një ndeshje të mirë dhe mentaliteti ishte i duhuri. Shpejtësia jonë në fushë bëri që gjithçka të dukej shumë e thjeshtë. Unë po njihem me shokët e ekipit brenda fushe dhe jam i lumtur pasi gjithçka po shkon mirë”, tha Kejn pas ndeshjes.