Kërkohej për trafik droge, kapet në kufirin shqiptar 41-vjeçari serb

Një 41-vjeçar serb është ndaluar në pikën kufitare të Morinës pasi ishte shpallur në kërkim ndërkombëtar nga Serbia për prodhim dhe shitje të lëndëve narkotike.

Sipas policisë, si rezultat i intervistimit të detajuar dhe shkëmbimit të informacionit ndërmjet Interpol Tiranës dhe homologëve në Serbi, u ndalua në hyrje të Shqipërisë, me qëllim ekstradimin në Serbi, shtetasi serb Dushan Joviçiç, 41 vjeç.

Joviçiç ishte shpallur në kërkim pasi gjykata serbe e kishte dënuar me 9 vite burg për prodhim dhe shitje të lëndëve narkotike.

“Shërbimet e Policisë Kufitare krahas zbatimit të marrëveshjes për qarkullimin e lirë ndërmjet Shqipërisë dhe Kosovës, kanë rritur vigjilencën për goditjen e paligjshmërive në kufi, si dhe për ndalimin e shtetasve që sinjazohen si të shpallur në kërkim dhe tentojnë të hyjnë apo të dalin nga kjo pikë kufitare.

Ai ishte shpallur në kërkim ndërkombëtar, pasi Gjykata e Themelore Kraljevo, e ka dënuar me 9 vite burg, për prodhim dhe shitje të lëndëve narkotike.

Në përfundim të veprimeve, Sektori për Hetimin e Krimeve në DVP Kukës, bënë arrestimin provizor të këtij shtetasi, me qëllim ekstradimin e tij drejt Serbisë. Vijojnë procedurat për ekstradimin e 41-vjeçarit, në Serbi”, thuhet në njoftimin e policisë.