Këshilltarja e kryeministrit të Kosovës ndalohet në kufirin e Serbisë, Kurti: Sh…

Këshilltarja e kryeministrit të Kosovës ndalohet në kufirin e Serbisë, Kurti: Shkelje e rëndë e të drejtës themelore të lirisë së lëvizjes

Zyra e shtypit e kryeministrit të Kosovës, Albin Kurti, ka reaguar në lidhje me ndalimin e Këshilltares për Preshevë, Medvegjë e Bujanoc, Ardita Sinani nga policia kufitare e Serbisë.

Sipas njoftimit për shtyp, Kurti ka kërkuar nga Serbia që të ndalojë diskriminimin me bazë etnike dhe shtypjen e të drejtave të komunitetit shqiptar në Luginën e Preshevës.

“Ndalimi i Këshilltares së Kryeministrit të Republikës së Kosovës për Preshevë, Medvegjë e Bujanoc, Ardita Sinani në vendkalimin kufitar Muçibabë nga policia kufitare e Serbisë është shkelje e rëndë e të drejtës themelore të lirisë së lëvizjes. Znj. Sinani është ndaluar dhe mbajtur për gati një orë sot në pikën kufitare pa i dhënë arsye për ndalesën e saj e që për qëllim ka frikësimin dhe maltretimin vetëm për shkak të përkatësisë shqiptare”,- thuhet në deklaratën për shtyp të zyrës së kryeministrit.

Sipas kreut të qeverisë së Kosovës, kjo sjellje e Serbisë, e cila, përveçse nuk lejon edukimin e lartë në gjuhën shqipe dhe punësimin në institucione publike, përbën edhe shkelje të rëndë të të drejtave themelore të komunitetit shqiptar në Luginën e Preshevës, atë të lirisë së lëvizjes.

“Për të reduktuar sa më shumë numrin e shqiptarëve që jetojnë në jug, shteti po bën të ashtuquajturin ‘pasivizimin e adresave të banimit që u përkasin shqiptarëve’ që punojnë jashtë vendit, qoftë në Evropën Perëndimore apo në Kosovë. Masa është në thelb një formë e spastrimit etnik përmes mjeteve administrative”,- citon zyra e kryeministrit raportin e Komitetit të Helsinkit.

Burimi