KKT miraton lejen për hyrjen e Shkodrës – Nis puna për zgjerimin e korsive të rrugës në zonën e Bahçallëkut
Në mbledhjen e fundit, Këshilli Kombëtar i Territorit ka miratuar lejen për hyrjen e Shkodrës, që përfshin projektin e rikualifikimit urban të saj.
Projekti synon të përmirësojë infrastrukturën dhe qarkullimin, duke hapur rrugë për investime të reja, zhvillim ekonomik dhe turizëm.
Në këtë mënyrë , pritet që hyrja e Shkodrës të transformohet në një hapësirë moderne dhe funksionale , në përputhje me nevojat e qytetit dhe pritshmëritë e banorëve.
Rruga nga Harku i Bërdicës deri tek Ura Bahçallekut prej disa ditësh i është nënshtruar një rikonstruksioni të plotë.
Ky segment rrugor po transformohet tërsisht. Firma kontraktuese po punon aktualisht për zgjerimin e rrugës.
Investimi që po realizohet nga qeveria shqiptare kap vlerën e 10 milion eurove.
Projekti parashikon ndërtimin e rrugës me katër korsi, gjithashtu edhe ndërtimin e një tjetër ure.
Lidhur me projektin trasnformues të hyrjes së qytetit reagoi në rrjete sociale kryebashkiaku Benet Beci.
“Makineri të tonazhit të rëndë, fadroma dhe mjete të tjera pune janë duke pastruar dhe përgatitur kantierin në hyrje të Shkodrës.
Investimi i shumëpritur nga i gjithë qyteti do të hyjë në fazën konkrete të punimeve për t’i dhënë Shkodrës pamjen që i ka munguar prej 34 vitesh.
Punë të mbarë të gjithëve!”, shkruan kryebashkiaku.
