Koçiu thirrje grave dhe vajzave: Vizitohuni pa asnjë kosto, parandaloni kancerin e gjirit

Ministrja e Shëndetësisë dhe Mbrojtjes Sociale, Albana Koçiu ka përcjellë sot një mesazh sensibilizues për të gjitha gratë dhe vajzat, që të vizitohen në kohë dhe të parandalojnë kancerin e gjirit.

“Detyrat dhe impenjimet e shumta zënë ditën e çdo gruaje shqiptare, por shëndeti vjen i pari! Kjo, për të garantuar një jetë të gjatë dhe të shëndetshme pranë familjes. Lëri punët dhe ndalu pak; vizitohu për gjirin dhe parandalo kancerin e gjirit, sepse ia vlen të jetosh”, thotë në mesazhin e saj në rrjetet sociale, ministrja Koçiu.

Ministrja Koçiu ka bërë thirrje sensibilizuese në mënyrë të vazhdueshme për të gjitha gratë dhe zonjat në vend që të drejtohen në kohë te mjeku i familjes, të kryejnë kontrolle periodike, sepse në këtë mënyrë mund të parandalojnë në kohë kancerin e gjirit.

Përveç mjekëve të familjes, në 12 qytete të vendit janë plot 14 pajisje mamografie të shpërndara në dispozicion të çdo qytetari, pa asnjë kosto.

Kontrollet e rregullta janë thelbësore për luftën kundër kancerit.