“Kolonia e piktorëve” promovon Ulqinin – Rreth 50 artistë nga Shqipëria dhe Ballkani prezantuan punimet në qytetin bregdetar
Për katër ditë me radhë, Ulqini, qyteti shqiptar i Malit të Zi priti aktivitetin tradicional “Kolonia e piktorëve” që së fundmi uli siparin e edicionit të VIII të tij. Rreth 50 artistë u bënë pjesë e tij duke i dhënë ngjyra qytetit bregdetar.
Artistët pjesëmarrës prezantuan rreth 150 punime me temën “Ulqini në telajo” përmes të cilave shfaqen vlerat e qytetit të lashtë bri Adriatikut, bukuritë natyrore si dhe kultura e tradita e tij.
Edicioni i VIII i Kolonisë së Piktorëve u organizua nga Instituti i Librit dhe Promovimit në Shqipëri me mbështetjen e Ministrisë për të Drejtat e Pakicave, Qendrës për Ruajtjen dhe Kultivimin e Kulturës së Pakicave në Malin e Zi dhe Organizatës Turistike të Ulqinit.
Në edicionin e VIII-të kolonisë së piktorëve ishin artistë nga Mali i Zi, Shqipëria, Kosova, Maqedonia e Veriut, Lugina e Preshevës, Austria, Rusia dhe nga Kroacia.
