Kombëtarja e Boksit në Europianin e Beogradit/Kuqezinjtë konkurojnë me pesë pesha, spikasin shkodranët Kajoshi dhe Drini

Kombëtarja e boksit e drejtuar nga trajneri shkodran Zef Gjoni, si dhe kolegët e tij Gëzim Zeneli dhe Sead Bushati është pjesëmarrëse e Kampionatit Europian për kategorinë e të rriturve, i cili këtë vit zhvillohet në kryeqytetin serb Beograd.

Në përbërje të delegacionit sportiv shqiptar bëjnë pjesë pesw boksierë. Ato janë: Ani Haxhillari kategoria e peshës 57 kg, Alban Beqiri kategoria e peshës 71 kg, Arjon Kajoshi kategoria 75 kg, Senad Drini kategoria 80 kg dhe Luis Gjolena kategoria 92 kg.

Në bazë të shortit që është hedhur, i pari që starton për ekipin tonë është boksieri Ani Haxhillari kategoria 57 kg i cili do të ketë përballë Krzpiet Jakub ( Poloni). Më pas do të jetë boksieri shkodran Senad Drini kategoria 80 kg i cili do të ketë përballë Osaro Lucky Aimufua ( Austri).

Menjëherë pas Drinit në programin e konkurimit është radha e boksierit tjetër shkodran Arjon Kajoshi që bokson në kategorinë 75 kg i cili do të ketë përballë Marian Alexandru Buleu ( Roumani). I fundit nga lista e boksierëve shqiptarë në këtë Europian është konkurimi i Luis Gjolenës kategoria 92 kg i cili do të ketë përballë Koppany Feher (Hungari).

Nisur nga faza përgatitore e zhvilluar në Shkodër pak ditë më parë, pritshmëritë më të mëdha për medalje janë për dy boksierët shkodranë, Arjon Kajoshi dhe Senad Drini.