Komisionerja Marta Kos, optimiste se Shqipëria do t’i mbyllë negociatat brenda 2027
Që Shqipëria do të mbyllë negociatat me Bashkimin Evropian në vitin vitin 2027, këtë e konfirmon edhe komisionerja evropiane për Zgjerimin, Marta Kos.
Në një intervistë për Radio Televizionin Slloven, komisionerja Kos shprehet me nota pozitive për integrimin e vendit tonë në Bashkimin Europian.
“Dy shtete nga Ballkani Perëndimor janë në pararojë të procesit të anëtarësimit në BE. Mali i Zi renditet në krye, vend me të cilin negociatat mund të përfundojnë deri në fund të vitit 2026. Shqipëria është në vendin e dytë dhe besoj se mund të kalojë vijën e finishit për t’i mbyllur negociatat në fund të vitit 2027. Vendimi përfundimtar do të merret nga shtetet anëtare të BE-së. Jam e vetëdijshme për rëndësinë e jashtëzakonshme të komunikimit, sepse nuk mund ta imagjinoj që pasi të kenë përfunduar të gjitha negociatat, shteti anëtar do të thoshte ‘jo, ne nuk e duam atë vend në Bashkimin Europian’. Prandaj jam optimiste për të dyja shtetet pararojë, Shqipërinë dhe Malin e Zi,” u shpreh znj. Kos.
Edhe më herët, komisionerja për Zgjerimin deklaroi nga Tirana se Shqipëria ka bërë progres të dukshëm në procesin e integrimit dhe se vendi e meriton të jetë në BE.
