Komisioni hetimor për sistemin TIMS, Dogjani: Ervin Muça ka transferuar 1 mln euro, mund të jetë agjent i shërbimeve të huaja

Deputeti i Partisë Demokratike, Asllan Dogjani ka ngritur dyshime për mënyrën e përdorimit të të dhënave të sistemit TIMS nga ana e ish-drejtorit të IT-së në Policinë e Shtetit, Ervin Muça i arrestuar pak ditë më parë, se ky i fundit mund të jetë agjent i shërbimeve të huaja.

Sipas Dogjanit, ka të dhëna se Ervin Muça në periudhën që ka  qenë pjesë e AKSHI-t ka tentuar të transferojë 1 milion euro kompanisë “Soft&Solution” duke përdorur një punonjës tjetër.

“Në kemi ngritur një komision, sepse ka ndodhur një skandal në Shqipëri. Nuk është hera e parë, kur këtu akuzohen për ndërhyrje në sistemin TIMS dhe jo vetëm.

Dyshohet se ky Ervin Muça ka ndërhyrë dhe ka nxjerrë nga tatimet, të dhëna që kanë të bëjnë më pagën.

Ka të dhëna që ka qenë dëshmitar te kadastra edhe nga aty paska nxjerrë të dhëna. Na ka nxjerrë targat, por unë kam edhe një informacion tjetër, në kohën që ka qenë te AKSHI, paska një kallëzim nga punonjësi i tij, që paska ndërhyrë nëpërmjet një punonjësi të transferojë 1 milion euro një kompanie soft – solution dhe e ka kap shefja e thesarit dhe kur ka pyetur këtë punonjësin, ky ka thënë unë nuk di gjë. Atëherë ka bërë kallëzim punonjësi dhe është larguar nga puna”, u shpreh Dogjani në fjalën e tij në komisionin hetimor për sistemin e të dhënave të TIMS.

Dogjani shtoi se përveç kësaj ka marrë edhe një punonjës tjetër, Klodian Mazari, “i cili qenka e dënuar në Itali. Është arrestuar tani për shfrytëzim prostitucioni dhe trafik droge. Si ka mundësi që ky njeri i dyshuar, i hetuar merret dhe vendoset në krye të sistemit TIMS. Ky njeri ose duhet  të jetë një agjent i shërbimeve të huaja, siç tha Berisha mund të jetë agjent i shërbimeve Ruse. Unë do t’i kërkoja që ta shtrijmë objektin e hetimit. Është cenuar siguria kombëtare”