Komisioni i Medies nis procedurën për shkarkimin e Këshillit Drejtues të RTSH

Në Komisionin parlamentar për Edukimin dhe Mjetet e Informimit Publik, mazhoranca dhe opozita vendosën që të nisin procedurat e shkarkimit të nëntë anëtarëve të mbetur të Këshillit Drejtues të Radio Televizionit Shqiptar, pas dorëheqjeve të Gëzim Podgoricës dhe Genc Përmetit.

Deputeti socialist Petro Koçi propozoi ndryshim të formulës për përzgjedhjen e anëtarëve të rinj të Këshillit Drejtues.

“Formula politike është e meta kryesore. Duhet të ndryshohet formula politike. Ky Këshill e ka mbaruar mandatin e vet moral,” u shpreh z. Koçi.

Këtë të martë, duke nisur nga ora 10:00 paradite, Komisioni do u japë mundësinë 9 anëtarëve të Këshillit të RTSH-së për t’u shprehur në një seancë të gjatë dëgjimore.

Në seancën e mëparshme, më 3 shkurt, deputetët kërkuan shpjegime nga Këshilli Drejtues rreth procesit të përzgjedhjes së Drejtorit të Përgjithshëm të RTSH-së.