Komisioni Parlamentar i Ligjeve ‘shkrin’ Agjencinë Kombëtare të Diasporës
Agjencine Kombetare te Diaspores
Komisioni për Çështjet Ligjore, Administratën Publike dhe të Drejtat e Njeriut, në mbledhjen online të enjten, mori në shqyrtim një projektligj dhe 6 projektvendime që lidhen me strukturat e institucioneve të pavarura të krijuara me ligj.
Mbledhja mori në shqyrtim projektligjin për shfuqizimin e ligjit “Për krijimin e Agjencisë Kombëtare të Diasporës”, i cili u prezantua nga Artemis Dralo, zëvendësministre për Europën dhe Punët e Jashtme dhe u relatua nga deputeti, Eduard Ndreca.
Në prezantimin e saj, Malo paraqiti argumentet për nevojën e shfuqizimit të ligjit tashmë që diaspora ka një rol shumë të rëndësishëm në politikën e jashtme, duke shërbyer jo vetëm si urë lidhëse mes vendit të origjinës dhe vendit pritës, por dhe për zhvillimin ekonomik dhe social.
Ndër të tjera, Malo sqaroi se, krijimi i Agjencisë së Diasporës lindi si nevojë në kushtet kur ministri përgjegjës për diasporën ishte ministër pa portofol dhe më tej renditi arsyet për nevojën e suprimimit të kësaj Agjencie pas kalimit të diasporës në fushën e përgjegjësisë të Ministrisë për Evropën dhe Punët e Jashtme.
Zëvendësministrja sqaroi se centralizimi i çështjeve të diasporës në aparatin e MEPJ-së do të krijojë lehtësi në qasjen koherente të politikave të angazhimit ndaj diasporës dhe mbikëqyrjen e zbatimit të Strategjisë Kombëtare të Diasporës.
Nisur nga modelet e vendeve ku politikat për diasporën janë kompetencë e ministrive të jashtme, u theksua se zhvillimi dhe konsolidimi institucional me diasporën është një nga funksionet dhe shtyllat kryesore të shërbimit të jashtëm për realizimin dhe ndjekjen e të cilit do të jetë përgjegjës një departament pranë MEPJ-së, si dhe të gjitha përfaqësitë diplomatike dhe konsullore të Shqipërisë.
Deputeti Eduard Ndreca, në cilësinë e relatorit, vlerësoi rëndësinë e projektligjit për të forcuar komunikimin me diasporën vetëm nëpërmjet një kanali komunikimi dhe theksoi se nisma është bazuar në modelet më të mira evropiane dhe është në përputhje me Kushtetutën e Rregulloren e Kuvendit.
Në këtë mbledhje, kryetarja e komisionit, Klotilda Bushka njoftoi se dekreti i Presidentit për kthimin e ligjit “Për dekoratat në Republikën e Shqipërisë” do të shqyrtohet në një mbledhje tjetër.
