Koncesioni i Triportit, hapet tenderi për monitorimin e zbatimit të kontratës me vlerë rreth 60 milionë lekë

Ministria e Infratsrukturës dhe Energjisë ka hapur tenderin për kontraktimin e një inxhinieri të pavarur, që të ofrojë ekspertizë në të gjitha fushat e koncesionit për mbikëqyrjen dhe monitorimin e zbatimit të kontratës koncesionare për projektimin, ndërtimin dhe mirëmbajtjen e “Portit të Integruar” në Triport Vlorë. 

Kontrata e partneritetit publik privat (PPP) për portin e Triportit u miratua nga qeveria në maj të vitit të kaluar, ndërkohë që zbatimi i saj do t’i kushtojë buxhetit të shtetit 59.29 mln euro, pa TVSH.

Sipas dokumenteve të tenderit, do të duhet që çdo aspekt i ecurisë së Koncesionit t’i nënshtrohet certifikimit në bazë të sistemeve të cilësisë dhe auditimit të rezultateve.

Kontrata ka një kohëzgjatje 10 – vjeçare, ndërsa referuar tabelës së pagesave nga Autoriteti Kontraktor, që është Ministria e Infrastrukutrës dhe Energjisë, disbursimi nga buxheti i shtetit do të nisë në vitin e 4 të kontratës. Çdo vit konsorciumit do t’i paguhet vlera prej 8.47 mln euro.

Porti i Integruar në Triport, Vlorë po ndërtohet në portin ekzistues të peshkimit të këtij qyteti që quhet “Triport”. 

Ai ishte i ndarë në dy pjesë. Në pjesën e brendshme ofron kapacitete për shërbimin e anijeve të peshkimit. Ndërsa në pjesën e jashtme ishte hapësirë e fituar pas ndërtimit të një dallgëthyesi.

Në zbatim të Vendimit të Këshillit Kombëtar të Territorit, në këtë port do të transferohen nga Porti i Vlorës edhe dy shërbime të tjera të cilat janë: Transporti ndërkombëtar i pasagjerëve dhe automjeteve dhe transporti kombëtar e ndërkombëtar i mallrave.