Konferenca- Rama: Të ndërtojmë Europën në Shqipëri

“Të ndërtojmë Europën në Shqipëri”, është kjo motoja e synimi i artikuluar nga Kryeministri Edi Rama në konferencën e dytë Ndërqeveritare Shqipëri-BE.

Në përgjigje të pyetjes së gazetares Denada Shkodrani mbi detyrat e Shqipërisë për të ecur para me procesin e anëtarësimit, kreu i qeverisë u shpreh se nuk është synim “largimi” i Shqipërisë në Bruksel, por që Bashkimi Europian të vijë në Shqipëri.

“Ta bëjmë Shqipërinë si një vend anëtar në mënyrën si funksionon, si I bën gjerat, në mënyrën e të qenit. Nuk duam që Shqipëria të largohet, të marrë çantën e të vijë në Bruksel, por BE të vijë në Shqipëri.

 Në Shqipëri kemi nisur të ndërtojmë Europën dhe ne këtë duam: Të ndërtojmë Europën në Shqipëri”, deklaroi Rama teksa shprehu synimin për përfundimin sa më parë të këtij procesi dhe për të përmbushur objektimin e Shqipërisë e 2030-ës.

“Është synimi ynë ta përmbyllim këtë proces brenda kësaj dekade dhe të jemi gati të trokasim në dyert e KE si shtet anëtar. Kjo sigurisht është shumë ambicioze dhe do kërkojë volum të jashtëzakonshëm pune. Kemi punuar shumë me komisionin dhe kemi hartuar një udhërrëfyes mjaft ambicioz. Kemi një plan: mbështetemi te miqtë dhe partnerët tanë për të na ndihmuar të arrijmë këtë gjë. Kjo është dykahëshe; jo vetëm politikisht. Kemi mbështetje të madhe. Por edhe teknikisht, ku kemi nevojë për dije, mbështetjen e trurit”, përfundoi Rama.