Konfirmohen 4 raste me murtajën afrikane te derrat e egër, u gjetën në malet e Hasit

Katër derra të egër që janë gjetur të ngordhur nga Shoqata e Gjuetarëve, dy në Pusin e Thatë dhe dy në Morinë ishin shenjat e para të alarmit që vuri në lëvizje shërbimin veterinar në Kukës e Has.

Pas inspektimit në terren, mostrat e marra u dërguan për analiza në Institutin e Veterinarisë, nga ku rezultuan të prekur nga mortaja e derrit. Drejtori i Shërbimit veterinar Bajram Peposhi, tha se u zbatuan protokollet përkatëse për asgjësimin e tyre

“Sëmundja në fjalë, prek vetëm derrat dhe nuk është e rrezikshme për transmetueshmëri tek njerëzit apo kafshët e tjera, por ka një shkallë të lartë mortaliteti dhe mund të depërtojë në stallat e derrave të butë që mbarështohen në zona të ndryshme të vendit”, tha Peposhi.

Peposhi shton se rastet në Pusin e Thatë dhe Morinë ishin të parat e shfaqjes së kësaj sëmundjeje në vendin tonë, ndërkohë që vendet kufitare të rajonit, Maqedonia e Veriut, Kosova dhe Mali i Zi e kanë të pranishme prej një viti.

“Shërbimi veterinar i Kukësit por edhe ai kombëtar kanë ndërmarrë edhe masat paraprake për monitorim të rreptë të situatës në stallat e derrave, duke qenë se nuk ka vaksine apo masë tjetër që frenon sëmundjen”, tha Peposhi.

Në Kukës nuk ka komplekse të mbarështimit të derrave, gjithsesi vitet e fundit është rritur ndjeshëm shtimi i tufave të derrave të egër pothuajse në të gjithë territorin e zonave të mbrojtura të qarkut, kjo fal edhe masave shtrënguese siç ishte moratoriumi i gjuetisë.