Konfiskimi i dokumentit, Kurti: Sulmi terrorist në Banjskë, pjesë e planit për të aneksuar veriun

Kryeministri Albin Kurti ka bërë me dije se Policia e Kosovës ka konfiskuar një dokument në të cilin konfirmohet se sulmi terrorist i 24 shtatorit në Banjskë, ishte pjesë e një plani më të madh për të aneksuar veriun e Kosovës përmes një sulmi të koordinuar në 37 pozicione.

Me anë të një postimi në rrjetin social X, Kurti shkruan se ky plan do të pasohej me krijimin e një korridori për në Serbi, që do të mundësonte furnizimin me armë dhe trupa.

“Në bazë të dokumentacionit të konfiskuar, @Kosovo_Police kanë konfirmuar se sulmi terrorist ishte pjesë e një plani më të madh për të aneksuar veriun e Kosovës përmes një sulmi të koordinuar në 37 pozicione të dallueshme. Do të pasonte krijimi i një korridori për në Serbi, për të mundësuar furnizimin me armë dhe trupa”, shkruan Kurti.

Kujtojmë se paraditen e së dielës (24 shtator), persona të maskuar dhe të armatosur hapën zjarr dhe hodhën granata dore në hyrje të fshatit Banjskë, ku mbeti i vrarë rreshteri Afrim Bunjaku dhe u plagos një tjetër polic.

Ngjarja solli reagimin jo vetëm të zyrtarëve nga Kosova e Serbia (e akuzuar nga Prishtina zyrtare si autore e sulmit), por edhe të ndërkombëtarëve të cilët dënuan sulmin dhe bën thirrje për gjetjen e një rruge për dialogun mes dy vendeve.

Sakaq, fill pas sulmit, Policia e Kosovës ushtroi një aksion për neutralizimin e grupeve kriminale serbe.

Po ashtu, Policia e Kosovës bëri me dije se eliminoi 3 sulmues, dhe arrestoi 6 të tjerë për posedim të armëve, të municionit dhe të radiolidhjeve. Një ditë më pas u konfirmuar dhe një tjetër i vrarë.