Konflikti me Izraelin, Biden akuzon Hamasin për krime lufte: Përdor civilët si mburojë

Presidenti amerikan Joe Biden ka akuzuar Hamasin për krime lufte. Duke iu referuar asaj që po ndodh në këtë luftë, ku sipas pretendimeve të Izraelit, Hamasi po përdor për mburojë spitalet e Gazës, Biden theksoi se kjo është një situatë e rrezikshme.

Gjatë takimit të tij me udhëheqësin e Kinës Xi Jinping të mërkurën, presidenti amerikan vuri në dukje se Hamasi po kryen krime lufte duke e mbajtur qendrën e tyre poshtë spitalit më të madh në Gaza, gjë që sipas tij, bëhet objektiv për ushtrinë izraelite.  

“Jemi në një rrethanë ku krimi i parë i luftës po kryhet nga Hamasi duke e mbajtur selinë e tyre, ushtrinë e tyre të fshehur nën një spital. Dhe ky është një fakt. Kjo është ajo që po ndodh”, u tha Biden gazetarëve gjatë një konference për shtyp të mërkurën.

Forcat izraelite filluan një bastisje të mërkurën herët në mëngjes në Al-Shifa, pasi akuzuan Hamasin se vepronte nga tunelet poshtë kompleksit të madh – një pretendim i mohuar nga grupi militant dhe zyrtarët e spitalit.

Izraeli tha se trupat e tij gjetën “pajisje ushtarake të përdorura nga Hamasi”.

Megjithatë, ajo nuk ofroi prova konkrete për një rrjet të gjerë tunelesh që pretendonte se ishte përdorur nga grupi militant.

Izraeli tha se do të paraqesë më shumë prova për të mbështetur pretendimet e tyre për një qendër komanduese të Hamasit, tha një këshilltar i kryeministrit Netanjahu për CNN.

Kushtet e spitalit Al-Shifa, i cili ka mbetur pa karburant dhe nuk konsiderohet më funksional, janë përkeqësuar me shpejtësi ditët e fundit mes luftimeve intensive, me mjekët që paralajmëruan për një situatë “katastrofike” për pacientët, stafin dhe njerëzit e zhvendosur ende brenda.

Bastisja e së mërkurës ka ngjallur gjithashtu kritika të gjera ndërkombëtare.

Biden vuri në dukje se SHBA-të i kanë bërë thirrje Izraelit të jetë “tepër i kujdesshëm” pasi synon Hamasin në zonë, por sugjeroi se veprimi ishte i justifikuar.

“Ne diskutuam nevojën që ata të jenë tepër të kujdesshëm. Ju keni një rrethanë ku e dini se ka një numër mjaft të madh të terroristëve të Hamasit. Hamasi ka thënë tashmë publikisht se ata planifikojnë të sulmojnë përsëri Izraelin, siç bënë më parë”, u shpreh Biden.

Presidenti vuri në dukje gjithashtu egërsinë e sulmeve të Hamasit të 7 tetorit në Izrael. “Dhe kështu, ideja se ata thjesht do të ndalojnë dhe nuk do të bëjnë asgjë nuk është realiste,” shtoi ai.