Korsitë e biçikletave – Më shumë lehtësi për pedaluesit në Shkodër

Korsia e re e biçikletave e nisur nga sheshi “Parrucë” ka vijuar deri në fund të lagjes Rus,  duke përfshirë edhe sheshin para markatës dhe tregut të fruta-perimeve, për të lehtësuar aksesin e blerësve, të cilët kryesisht janë përdorues të biçikletave.

Kjo ndërhyrje e Bashkisë Shkodër ka ecur me ritme të shpejta si pjesë e procesit të krijimit të unazës së korsive të biçikletave.

Përgjegjësi i sinjalistikës rrugore në Bashkinë Shkodër, Vladimir Ajkoviq, tha se ndërhyrja është vijueshmëri e planit të mobilitetit, duke treguar edhe segmentet ku është ndërhyrë për vendosjen e sinjalistikës përkatëse.

Korsia e re e biçikletave nga Parruca në lagjen Rus ka një gjatësi prej 1.3 km dhe përshkon qendrën e qytetit deri në fund të lagjes Rus.

Kjo ndërhyrje është bazuar në planin e mobilitetit të hartuar nga ekspertë të huaj në bashkëpunim me specialistë të Bashkisë Shkodër, i cili ka në themel rritjen e sigurisë së përdoruesve të rrugës dhe krijimin e unazës së korsive të biçikletave që e kthen Shkodrën në një qytet unik të lehtësisë së ofruar ndaj pedaluesve