Kosova feston Pavarësinë, qytetarët në Prizren: Urime gjithë shqiptarisë!
Sot Kosova feston 17-vjetorin e Pavarësisë.
Rrugët e zbukuruara me flamuj, qytetarë që ecin, dhe për t’i shtuar bukurinë kësaj dite, dëbora sapo ka nisur.
17 shkurti i vitit 2008 mbetet një nga datat më të rëndësishme për popullin e Kosovës, pasi shënon shpalljen e Pavarësisë së vendit.
Pas një periudhe të gjatë përpjekjesh dhe sakrificash, Kosova u njoh si shtet i pavarur, duke bërë një hap të madh drejt ndërtimit të së ardhmes së saj.
Qyteti i Prizrenit është veshur me flamuj në kuadër të festimeve të Pavarësisë.
Makinat e zbukuruara me simbole patriotike dhe qytetarët që brohorasin, krijojnë një atmosferë festive.
“Urime për Pavarësinë gjithë shqiptarisë, myslimanë, katolikë,” shprehet një banor i qytetit mes shumë të tjerëve që urojnë bashkëkombësit e tyre për këtë ditë historike, me krenari dhe gëzim.
Gjatë ditës së sotme në mbarë Kosovën po zhvillohen aktivitete të ndryshme në kuadër të festimeve të Pavarësisë.
