Kosova gati për Lituaninë, supersticiozi Foda synon tri pikët: Duam të kryesojmë grupin!
Trajneri i kombëtares së Kosovës në konferencën për shtyp nuk u mundua që të fshihej dhe tregoi se objektivi i skuadrës së tij ishte kreu i Crupit. “Nëse duam të kryesojmë grupin medoemos duhet të fitojmë ndeshjen ndaj Lituanisë. Para ndeshjes me Qipron nuk jemi stërvitur në fushën e stadiumit dhe kjo po na ndodh përsëri. Shpresojmë të na sjelli fat kjo gjë ashtu siç fituam ndaj qipriotëve”, pohoi Foda.
I pyetur mbi Lituaninë komisari teknik i Kosovës tha: “Lituania është një ekip i mirë me topin në administrim. Ne jemi të përgatitur, duhet të jemi kompakt në mbrojtje dhe të jemi të fokusuar mbi të gjitha për të marrë 3 pikët”.
Mes të tjerash ai pranoi se nuk kishte më dilemë sa i përket formacionit. “E kam në mendje se kush do të luajë nesër, por nuk mund ta them këtu. Kemi patur disa seanca ku i kam qartësuar idetë e mia. Kemi dhe një seancë të fundit nesër dhe rëndësi ka kompaktësia e ekipit”, tha Foda.
