Kosovë, prezantohet koncepti i Lojërave Mesdhetare 2030

Ministria e Kulturës, Rinisë dhe Sportit të Kosovës në partneritet me Komitetin Olimpik të Kosovës, prezantuan konceptin e Lojërave Mesdhetare, të cilat do të zhvillohen në Prishtinë në 2030.

Për të njohur qytetarët dhe në veçanti komunitetin sportiv për këtë ngjarje e cila do t’i shërbejë zhvillimit të sportit kosovar, mblodhën sportistë, përfaqësues të federatave, ambasadave, komunave dhe ministrive për të prezantuar hollësisht konceptin me të cilin është fituar e drejta e organizimit të Lojërave Mesdhetare.

Koncepti aktualisht ka 2 shtete dhe 11 komuna, duke përfshirë Durrësin. 

Janë 24 objekte sportive, prej të cilave 10 do të rinovohen, 4 do të ndërtohen, 5 të tjera janë në ndërtim e sipër, ndërkohë që do të bëhen 5 investime të përkohshme që do t’i shërbejnë sporteve të ndryshme.

Investimet në infrastrukturë janë të shtrira në tërë Kosovën: 25% e tyre në Prishtinë, 9% në Podujevë, Gjakovë dhe Pejë, 6% në Prizren, Gjilan dhe Mitrovicë si dhe 3% në Skënderaj, Drenas, Ferizaj dhe Durrës.

Koncepti fillestar do të nisë me hartimin e Ligjit të veçantë për Lojërat Mesdhetare, themelimin e Këshillit Organizativ të Lojërave Mesdhe si dhe hartimin e Master Planit.

“Sporti është prioritet i kësaj qeverie, e cila ka zotuar 253 milionë euro për këtë organizim”, shkruhet në faqen online të Ministria e Kulturës, Rinisë dhe Sportit.