Krimi kibernetik në rritje në vitin 2023

Rritja e teknologjisë në përdorimin masiv ka ekspozuar shqiptarët edhe ndaj krimeve kibernetike.

Mashtrimi kompjuterik është një nga veprat penale që ka pësuar rritje gjatë vitit 2023. Këtë e konfirmon raporti i Prokurorit të Përgjithshëm që është dorëzuar në zyrat e parlamentit, si pjesë e detyrimit që kanë institucionet e pavarura për të raportuar para deputeteve.

Sipas të dhënave që RTSH disponon rezulton se në vitin 2023 vërehet tendencë në rritje prej 25 % e procedimeve të regjistruara për këtë vepër penale, krahasuar me vitin 2022. E njëjta tendencë në rritje shënohet edhe veprën penale të Falsifikimit Kompjuterik.

Qyteti ku është shënuar ndërhyrja e paligjshme në të dhënat kompjuterike është Tirana me 68%, pasuar nga Durrësi dhe Elbasani me 7%, Vlora 3%, ndërsa qyteti ku teknologjia nuk shënon asnjë dëm në jetën e njerëzve është Kukësi me 0% të rasteve të denoncuara.

Meshkujt zënë numrin më të madh të profilit të të pandehurve, nga të cilët  42 % janë me arsim të lartë dhe shumica prej tyre, plot  94 % janë të padënuar më parë.