Kryeministri kanadez Trudeau raportohet se mund të japë dorëheqjen

Agjencia e lajmeve Reuters raportoi këtë të hënë se kryeministri kanadez Justin Trudeau (lex. Xhastin Trudo) mund të japë dorëheqjen, pas nëntë vjetësh në detyrë.

Sipas saj ende nuk është marrë një vendim përfundimtar, por 53-vjeçari pritet të njoftojë edhe largimin nga drejtimi i Partisë Liberale, që është aktualisht në pushtet në Kanada.

Largimi i Trudeau do ta linte partinë pa kryetar në një kohë kur sondazhet parashikojnë se liberalët pritet të pësojnë humbje të rëndë përballë konservatorëve të opozitës në zgjedhjet e ardhshme që duhet të mbahen deri në fund të tetorit.

Burimet për Reuters thanë se pritet që ai do ta publikojë vendimin përpara një takimi urgjent të ligjvënësve liberalë ditën e mërkurë.

Trudeau mori drejtimin e Partisë Liberale në vitin 2013 dhe mban postin e kryeministrit që prej vitit 2015.

Nëse 53-vjeçari jep dorëheqjen ka gjasa që vendi të shkojë në zgjedhje të parakohshme për të zgjedhur një qeveri të qëndrueshme, e cila duhet të përballet me administratën e re të presidentit amerikan Donald Trump (lex. Tramp) për katër vitet e ardhshme.

Trudeau ka qenë nën presion për të dhënë dorëheqjen që kur ministrja e tij e Financave, Chrystia Freeland (lex. Kristia Friland), dha dorëheqjen në mes të dhjetorit.