Kryeministri Rama në Spanjë, takim kokë më kokë me Mbretin Felipe VI
Kryeministri Edi Rama është pritur këtë të premte (7 shkurt) në një takim kokë më kokë nga Mbreti Felipe VI i Spanjës.
Takimi mes tyre u mbajt në rezidencën private të mbretit, Zarzuela.
Kreu i qeverisë shqiptare prej ditës së djeshme ndodhet në një vizitë zyrtare në Spanjë me rastin e pjesëmarrjes në ceremoninë e Çmimit Universal Spanjoll (“Espanol Universal Award”), një çmim që u jepet personave që kanë dhënë kontribut të rëndësishëm në promovimin dhe përmirësimin e kulturës, gjuhës dhe trashëgimisë spanjolle në mbarë botën.
Vetë kryeministri Rama ka publikuar pamje nga takimi i mbajtur me Mbretin Felipe VI, ndërsa bën me dije se pas pak do të nënshkruhet marrëveshja për organizimin e “World Law Congress Albania 2027”, Kongresit Botëror të Ligjit në vitin 2027, i cili do të mbahet në Tiranë e do të sjellë rreth 3 mijë juristë nga gjykatat supreme dhe sistemet gjyqësore të shumë vendeve të botës
“Në mikpritjen e bukur edhe për nder të Shqipërisë, organizuar nga Madhëria e Tij, Mbreti Felipe VI, me anëtarët e bordit të “World Jurist Association”, organizata prestigjioze ndërkombëtare e juristëve, gjyqtarëve, akademikëve dhe profesionistëve të ligjit nga e gjithë bota, në vigjilje të nënshkrimit të marrëveshjes për organizimin e “World Law Congress Albania 2027”, Kongresit Botëror të Ligjit në vitin 2027, i cili do të mbahet në Tiranë e do të sjellë rreth 3 mijë juristë nga gjykatat supreme dhe sistemet gjyqësore të shumë vendeve të botës”, shkruan Rama në rrjetin social Facebook.
