Kryesuesi i OSBE-së në Kosovë, pritet nga Osmani dhe Kurti

Presidentja e Kosovës, Vjosa Osmani ka pritur këtë të enjte (11 prill) në takim kryesuesin e OSBE-së, i cili është edhe ministër për Punë të Jashtme, Evropë dhe për Tregti i Maltës, Ian Borg.

Ky i fundit, gjatë vizitës në Kosovë do të takohet edhe me Kryeministrin Albin Kurti, zëvendëskryeministren dhe Ministren e Punëve të Jashtme Donika Gërvalla-Schwarz, Shefin e Misionit të OSBE-së në Kosovë, Michael Davenport, stafin e misionit, dhe pjesëmarrës nga Akademia e Dialogut e OSBE-së.

“Kryesuesi Borg do të udhëtojë në Qendrën Rajonale të OSBE-së në Gjilan për t’u takuar me organizatat lokale të shoqërisë civile dhe përfaqësuesit e komuniteteve nga komuna të ndryshme për të diskutuar rreth të drejtave të komuniteteve, angazhimin e të rinjve dhe fuqizimin e grave. Ai do të takohet edhe me kryetarët e komunave që përfaqësojnë komunitete të ndryshme për të diskutuar lidhur me bashkëpunimin ndër-komunal të mbështetur nga OSBE. Ministri Borg do të takohet edhe me Peshkopin Teodosije nga Kisha Ortodokse Serbe”, njofton OSBE.

Takimi është mbajtur në objektin e Presidencës, ndërsa mediat janë lejuar që të marrin pamje në fillim të takimit.